Франциянинг янги бош вазири сифатида илгари мамлакат ИИВда раҳбар сифатида ишлаган Бернар Казнёв фаолият юритадиган бўлди. Бу ҳақда Елисей саройида ҳукумат раҳбари Манюэль Вальс истеъфога чиққач, маълум қилинган.

Вальснинг ҳукумат раҳбарлигидан кетиш нияти расмий равишда 5 декабрь куни маълум қилинди. Ўшанда у 2017 йилда ўтадиган Франция президенти сайловида ўз номзодини илгари суришини айтиб ўтган. Вальс ҳукумат раҳбарлигидан кетар экан бутун диққат-эътиборини Социаль партияда бўладиган праймериз олдидан сайловолди кампаниясига қаратади. Социалчилар праймеризи 2017 йилнинг январь ойида ўтказилади, дейилади хабарда.

Вальс бош вазир сифатида 2014 йилнинг март ойидан иш бошлаган, Жан-Марк Эйронинг ўрнига келган эди. Вальс вазирлар маҳкамасини икки марта шакллантиришга улгурган.

Бернар Казнёв Франциянинг амалдаги президенти Франсуа Олланднинг ёрқин тарафдорларидан бири ҳисобланади. У 2012 йилдан бошлаб ҳукуматнинг турли лавозимларида ишлаб келган, шунингдек, бюджетга жавобгар бўлган. 2014 йилнинг апрель ойидан мамлакат ИИВ раҳбари сифатида фаолият юритиб келаётган эди.