Англия футболи афсонаси, «Ньюкасл»нинг собиқ ҳужумчиси ва сардори Алан Ширер Букингем саройида ўтказилган маросимда Британия империясининг фахрий ордени билан тақдирланди. BBC хабарига кўра, футболчига хайрия ишларидаги фаоллиги учун мукофот топширилган.

Ширернинг Alan Shearer Foundation жамғармаси 2012 йилдан буён имконияти чекланган инсонларга ёрдам кўрсатиб келади.

Империянинг олиймақом ордени бўлмиш рицарлик ордени Британия қироли Георг V томонидан 1917 йилнинг 4 июнида таъсис этилган. Биринчи ва иккинчи тоифадаги мукофот соҳиблари рицарлик мақомига сазовор бўлади. «Командор» — учинчи тоифадаги орден бўлиб, бу рицарлик мақомини бермайди.