Россиянинг Липецк вилоятида яшовчи 62 ёшли аёл отасининг вафот этганини яшириб, унинг ўлимидан кейин отаси учун 23 йил пенсия олиб юрган. 

Оқибатда ноқонуний йўл билан 2,59 млн рублни ўзлаштирган аёлга 10 йиллик қамоқ жазоси ҳавф солмоқда, деб маълум қилди Липецк вилояти прокуратураси матбуот хизмати. 

"1954 йилда туғилган липецклик аёл 1994 йил августидан 2016 йил майигача Россия Пенсия жамғармаси вилоят бошқармаси ходимларини алдаб, вафот этган отаси учун пенсия олиб юрган. Ўғирланган пулларнинг қиймати 2,59 млн рублни ташкил қилган", дейилди прокуратурада. 

Шу сабабли прокуратура ўта йирик миқдорда фирибгарлик ҳолати бўйича айблов хулосасини тасдиқлади. Аёлга 10 йил қамоқ жазоси ва 1 млн рубль жарима хавф солмоқда. 

Прокуратурада маълум қилинишича, аёл 2010 йил январидан 2016 йил майигача коммунал тўловлар ва яшаш жойига ҳақ тўлашда уруш фахрийси бўлган отаси имтиёзларидан фойдаланиб, отаси учун 71,1 минг рубллик кмпенсация олган. 

Прокуратурада таъкидланишича, фирибгарлик аёл Липецкда, отаси эса қишлоқда яшагани сабабли мумкин бўлган. "Аввалроқ эркак қизиникида яшаган, унинг манзили бўйича пенсиясини олган, кейин эса қишлоққа қайтиб кетиб, 1994 йилда вафот этган. Бироқ аёл ўз манзили бўйича пенсия келтирган почтальонларга отаси қишлоқда яшаётганини айтиб, у учун тўлов ведомостида имзо чекиб юрган", деб айтилди прокуратурада.