Суд 2015 йил Москвада ёлғиз яшовчи икки нафар аёлнинг жонига қасд қилган 33 яшар Фарҳод Ҳабибилаевга ҳукм ўқиди. У қурбонларининг уйига тиббий жиҳоз олиб келувчи курьер қиёфасида кирган. Бу ҳақда 6 декабрь куни Россия тергов қўмитаси пойтахт бошқармаси бошлиғининг ўринбосари Юлия Иванова маълум қилди.

Ф. Ҳабибилаев 24 йил муддатга озодликдан маҳрум этилган. У дастлабки 10 йилни қамоқхонада, қолган жазо муддатини эса қаттиқ тартибли колонияда ўтказади.
«Ҳибибуллаев 2015 йилнинг 25 май куни Москва шаҳрида ёлғиз яшовчи 76 яшар аёлга ҳужум қилади. Уни бўғиб ўлдиргач, хонадондан 20 минг рубль олиб чиқиб кетади. Кейинроқ, 2015 йилнинг 24 июнь куни Москва шаҳрида ёлғиз яшовчи 88 яшар аёлнинг бошига ўтмас буюм билан камида етти марта уради, сўнгра уни бўғиб ўлдиради», — деди Иванова.

Иккинчи қурбонининг жонига қасд этган жиноятчи хонадонни тинтиб чиқиб, у ердан 70 минг рубль ҳамда жабрдийданинг укасидан ёдгор қолган “Собиқ иттифоқ қаҳрамони” орденини олиб чиқиб кетади.

Суриштирув натижалари шуни кўрсатди-ки, Қирғизистондан Москвага келган 33 яшар Фарҳод Ҳабибуллаев ҳақиқатан ҳам тиббиёт фирмаларидан бирида ноқонуний равишда курьер бўлиб ишлаган. Унинг қурбонлари ана шу фирма мижозлари бўлишган.