Қозоғистон пойтахти Остонада бир аёл бош прокуратура биноси ёнида ўзига ўт қўйди. Бу ҳақда Tengrinews.kz ахборот агентлиги хабар бермоқда

Бош прокуратурада айтилишича, 6 декабрь соат 12.16да бош прокуратура назорат-ўтказиш пункти хонаси ёнига бир аёл уч ҳамроҳи билан келиб, устки кийимини ечиб, устига бензин қуйиб, ўзини ёқиб юборган.

"Назорат-ўтказиш пункти ходимлари оловни ўчириш бўйича зудлик билан чоралар кўришган. Аёл бирданига ва кутилмаганда ҳаракат қилган ва ўзига ўт қўйишдан аввал ҳеч қандай эътироз билдирмаган. Аёлга биринчи тиббий ёрдам кўрсатилиб, тез ёрдам чақиртирилган", деб маълум қилинди прокуратурада.  
 
Таъкидланишича, М.Рисманова исмли бу аёл ўғли судланганига норозилик сифатида шундай йўл тутган. У бош прокуратурага 28 ноябрда мурожаат қилган. Унинг даъволари текширилиши учун бош прокуратура суддан жиноий иш материалларини сўраган.

Аёлнинг ўғли 2015 йил июнда катта миқдорда героин ва гашиш сақлаганлик учун 4 йил 6 ойга озодликдан маҳрум қилинганди. Судланувчи ҳукм устидан шикоят қилган, бироқ унинг шикояти қондирилмаган.
 
Остонадаги биринчи шаҳар шифохонаси қабул бўлимида аёл жонлантириш бўлимида эканлигини маълум қилинган.