Венесуэлада истиқомат қилувчи аёллар, мамлакатда давом этаётган жиддий иқтисодий ва ижтимоий инқироз туфайли таом, болалар таглиги ва дорилар учун сочларини сотишга мажбур бўлмоқда. Бу ҳақда Reuters агентлиги хабар қилмоқда.

Таъкидланишича, сўнгги ҳафталарда пул топишнинг бу усули анча кенг тарқалмоқда. Венесуэланинг Сан-Антонио шаҳрини Колумбиянинг Ла-Парада шаҳри билан боғловчи кўпригида ўнлаб кишилар соч харид қилишни айтиб туришади. 

Агентлик маълумотларига кўра, кунига тахминан 200 нафар аёл Колумбия ҳудудидаги қўлбола пунктлардан бирига келади. Бу ердан олинган сочлар Колумбиянинг Кали шаҳрида сотилади. 

45 ёшли сотувчи аёл Селина Гонзалес бир соатлар навбатда туриб, сочини 60 минг Колумбия песоси (тахминан 20 доллар)га сотган. Бу Венесуэлада энг кам ойлик иш ҳақи ва таом учун бериладиган талон қийматига тенгдир. 

Венесуэла ахборот вазирлигида агентликнинг саволига изоҳ беришмаган. 

Ҳозирда, Венесуэлада миллий пул бирлиги – боливарнинг ҳаддан ортиқ қадрсизланиши ва гиперинфляция кузатилмоқда. Шу сабабли сотувчилар пулларни тарозуда ўлчаб олишаяпти.