Ҳиндистон мудофаа вазирлиги Cheetah ва Chetak русумли 280дан ортиқ вертолётнинг парвозини бутунлай тўхтатди. Hindustan Aeronautics Limited миллий компанияси уларнинг ҳар бирини хавфсизлик жиҳатидан қайта ўрганиб хулосасини бермагунча, ушбу турдаги вертолётлар уча олмайди. Мудофаа вазирлиги хабарига кўра, ушбу учар техникаларнинг тез-тез ҳалокатга учраб туриши, шундай қарор қабул қилишга сабаб бўлган. 

Хабарда айтилишича, "комплекс текширувларни ўтказишга, хусусан, 30 ноябрда Cheetah вертолётининг Ғарбий Бенгалияда қулаб тушиши оқибатида 3 кишининг ҳаётдан кўз юмгани сабаб бўлган".

Умуман, 50 йиллар муқаддам ишлаб чиқилган вертолётлар билан 2012-2016 йилларда юз берган 7та йирик фожиада жами 12 киши ҳаётдан кўз юмган. 

Ҳиндистон ҚК енгил вертолётлари паркидаги Cheetah ва Chetak яқин-яқингача HAL томонидан Франциянинг ҳозирда мавжуд бўлмаган икки фирмаси Aerospatiale ва Sud Aviation томонидан берилган лицезия асосида ишлаб чиқилган. 1960 йиллар ўрталаридан бери жами 625 дона вертолёт ишлаб чиқарилган. Гарчи уларни ишлаб чиқиш тўхтатилган бўлса-да, "HAL мавжудларининг техник ҳолати учун масъулдир".