Жорий йилда барча истовчилар яқин масофадан Янги йил либосларини кийиб олган Британия қироллик оиласини томоша қилишлари мумкин. Қиролича Елизавета, унинг турмуш ўртоғи шаҳзода Филипп, шаҳзода Чарльз ва унинг рафиқаси Камилла, шаҳзода Уильям ва малика Кейт ҳамда шаҳзода Гарри Янги йил мавзусидаги ажойиб свитерларда омма олдида гавдаланишади. Бироқ ростини айтганда, қироллик оиласи аъзолари билан саройда эмас, балки Лондондаги Тюссо хоним музейида мумдан ишланган нусхалари билан учрашиш мумкин.

Гап шундаки, жорий йилда музей антиқа хайрия акциясини ўтказишга қарор қилди. Қироличанинг рухсати билан қироллик оиласи барча аъзоларининг мумдан ишланган нусхалари яқинлашиб келаётган Рождество услубидаги либосларга кийинтирилдилар. Қизиғи, Кейт ва Уильям ажралмас жуфтлик эканликларига ишора қилиниб, битта яхлит катта свитерга буркантирилдилар. Гаррига эса унинг Жанубий қутбга экспедицияда иштирок этганига ишора сифатида қувноқ пингвин кўринишидаги тўқ яшил свитер насиб этди. Ҳаттоки қироличанинг севимли итларига ҳам свитерлар яратилди. Қироличанинг ўзига эса итларидан бирининг бошига тож кийдирилган тасвири туширилган свитер кийгазилди.   

Қироллик оиласининг бу мум ҳайкалларини декабрь давомида томоша қилиш мумкин. Акция ташкилотчиларининг фикрича, бу антиқа манзара қўшимча ташриф буюрувчиларни жалб қилади. Бундан ташқари, қироллик уйи аъзолари билан муайян ҳақ эвазига суратга тушиш мумкин бўлади. Тадбирдан тушган барча пуллар ночор давлатларда яшовчи муҳтож оилаларнинг фарзандлари таълим олиши ва даволаниши учун маблағ йиғувчи Save the Children жамғармасига ўтказилади.