Халқаро олимпия қўмитаси (ХОҚ) 2012 йил Лондонда ўтган Олимпияда ўйинларида иштирок этган россиялик барча спортчиларнинг допинг намуналарини қайта текширади. Бу ҳақда ХОҚ раҳбари Томас Бах маълум қилган.

Маклареннинг мустақил комиссияси ўз маърузасининг иккинчи қисмини 9 декабрь куни Лондонда тақдим этди. Унда тасдиқланишича, мингдан зиёд россиялик спортчи турли мусобақаларда, жумладан, 2012-2014 йилги Олимпиада ўйинлари, Универсиада-2013, ўша йили ўтган енгил атлетика бўйича жаҳон чемпионатида спортнинг 30 йўналиши бўйича допинг намуналари манипуляцияларига жалб этилган.

“Профессор Маклареннинг маърузасидан сўнг, 2012 йилги Олимпиада ўйинларида иштирок этган россиялик барча спортчиларнинг намуналарини қайта текширишга кўрсатма бердим”, деб Бахнинг сўзларидан иқтибос келтирмоқда “Рейтер” агентлиги.