Корея республикаси президенти Пак Кин Хе ўзига нисбатан импичмент билан боғлиқ вазиятни узил-кесил ҳал қилувчи Конституциявий суд қарорини кутади. Бу ҳақда, давлат раҳбарининг ўзи ҳукумат аъзолари билан учрашувида маълум қилган. Пак Кин Хе парламент аъзолари унга импичмент эълон қилиш бўйича қонун лойиҳасини маъқуллашганидан сўнг, вазирлар маҳкамаси йиғилишини ўтказди.

"Шу лаҳзадан бошлаб, Конституциявий суд қарорини ва коррупция ҳамда ҳокимиятдан ғаразли мақсадларда фойдаланиш бўйича олиб борилаётган тергов натижасини асосий қонун ва бошқа қонунларда белгиланганидек хотиржам кутаман", - деб қайд этган Пак Кин Хе. 

"Ишонаманки, президент ваколатини бажарувчи бош вазир (Хван Гё Ан) ва ҳукуматнинг бошқа аъзолари "ҳокимият бўшлиғи"га ва иқтисодиёт ҳамда хавфсизлик соҳасида беқарорликка йўл қўймаслик учун барча чораларни кўради", - деб таъкидлаган Пак Кин Хе.

Мамлакат етакчиси, шунингдек, ушбу сиёсий можаро келгусида мамлакат иқтисодий тараққиётини ривожлантириш двигателлари бўлувчи қатор лойиҳаларга салбий таъсир этганини қайд этган. Президент вазирлардан мазкур лойиҳаларга асосий эътиборни қаратишни сўраган. 

Корея республикаси парламенти депутатлари давлат раҳбари импичменти учун овоз беришгани ҳақида аввал хабар қилинган эди. 

Қонун лойиҳасини 234 нафар депутат маъқуллаган, 56 нафари қарши чиққан.