Қирғизистон президенти Конституцияга ўзгаришлар киритишга доир референдум демократия ва мамлакат мустақиллигини мустаҳкамлаш сари қўйилган катта қадам бўлишига умид қилмоқда. Алмазбек Атамбаевнинг якшанба куни сайлов участкасида берган баёнотига асосланиб, РИА "Новости" хабар берди. 

"Мамлакатда бугунги кундаги ижобий ўзгаришлар сақланиб қолиши учун халқ ушбу референдумни қўллаб-қувватлайди, деб орзу қиламан ва шунга умид билдираман", - деди Атамбаев. 

Унинг фикрича, Конституциядаги энг муҳим ўзгариш - мамлакат мустақиллигини мустаҳкамлаш. Шуни таъкидлаш жоизки, Асосий қонундаги ўзгаришлар тўрт блокдаги муаммолар ечимини топишга қаратилган: ҳукумат тармоқлари орасидаги ўзаро ҳамкорлик тамойилларини аниқлаштириш, ҳуқуқни муҳофаза қилиш ва суд тизими ислоҳотлари, қирғиз жамиятида юксак қадриятлар тизимини шакллантириш ва давлат тили (қирғиз тили) ҳамда расмий тилдаги (рус тили) матнлар ўртасидаги номувофиқликни бартараф этиш. 

Ўзгаришлар Конституциянинг жами 30 моддасига тегишли бўлади. Хусусан, Асосий қонундан республикани инсон ҳуқуқлари бўйича халқаро органларнинг қарорларини бажаришга ундовчи норма олиб ташланади. 

Бундан аввал бугун, 11 декабрда Қирғизистонда жорий Конституцияга ўзгаришлар киритиш бўйича умухалқ референдум бўлиб ўтаётгани ҳақида хабар берган эдик. Референдум билан бир пайтда республикада маҳаллий кенгаш сайловлари ҳам ўтказилмоқда. 

Рўйхатдан ўтган фуқароларнинг 30 фоиздан ортиғи овоз бериш жараёнида иштирок этса, референдум бўлиб ўтган деб ҳисобланади.