Миср пойтахти Қоҳира шаҳридаги муқаддас Марк номидаги коптлар соборида амалга оширилган теракт туфайли ҳалок бўлганлар сони ортди. Al Jazeera сайти маҳаллий манбаларга асосланиб хабар қилишича, қурбонлар сони 25 нафарга етган, камида 50 киши жароҳатланган.

Дастлабки маълумотларда теракт 7 кишининг ўлимига сабаб бўлгани айтилди. Кейинроқ қурбонлар сони 18 нафарга етгани хабар қилинди.

CBC Extra твиттерида қайд этилишича, ибодатхонада 12 килограмм тротилли портловчи қурилма ҳаракатга келтирилган.

Ҳозирда ҳодиса рўй берган ҳудуд ўраб олинган.

Ижтимоий тармоқда теракт жойида олинган видеолар тарқалмоқда.

Маълум қилинишича, олдиндан белгиланган вақтда портлаган бомба собор биноси деворига ўрнатилганди. Яна бошқа хабарларга кўра, портловчи қурилма ибодат вақтида номаълум шахс томонидан ичкарига улоқтирилган. Ҳозирча ҳеч қайси ташкилот ушбу портлаш учун жавобгарликни зиммасига олмади.

РИА Новости агентлиги Миср Ички ишлар вазирлигидаги манбасига асосланиб хабар қилишича, ушбу терактдан сўнг мамлакатдаги барча черковларда хавфсизлик чоралари кучайтирилган.

Христиан-коптлар турли манбаларга кўра, Миср аҳолисининг 10 фоиздан 20 фоизгача бўлган қисмини ташкил қилади (тахминан 6,5-13 миллион киши). Уларнинг аксар қисми Коптлар православ черковига, яна бир қисми — Коптлар католик черковига бўйсунади. Кейинги вақтларда коптлар тез-тез диний радикал кучлар нишонига айланмоқда.