Камера ёки дронлардаги стабилизаторлар - одатий конструкция элементлари: улар қўл қимирлаб кетиши  натижасида  тасвирнинг хиралашишига йўл қўймайди. Liftware ишлаб чиқарувчилари стабилизация тизимларини қўллашнинг яна бир усулини топишди - махсус механизмлар қошиқларга ўрнатилди. Уларнинг қандай ишлашига оид видео интернет тармоқларида тезкорлик билан тарқалмоқда. 

Компания "ақлли қошиқлар"нинг икки моделини ишлаб чиқарди. Биринчиси - Liftware Steady Паркинсон ва бошқа касалликларга чалинган кишиларга яқиндан ёрдам беради. Иккинчиси - Liftware Level  –  ҳаракатлар координациясининг бузилишида (мия фалажи, спастик шароитлар ва б.) қўлланилади. 

Қошиқлар электрон стабилизация тизимларини ўз ичига олган. 

Икки ошхона анжоми ҳам - стабилизация тизимли ручка, қошиқ, шунингдек заряд қурилмани ўз ичига олган тўпламлардан иборат. Аккумулятор заряди тахминан уч марта овқат ейишга етади. Бунга қўшимча равишда санчқи ва десерт қошиқчасини ҳам харид қилиш мумкин. 

Liftware Steady тўпламида электрон ҳаракат датчиклари ва маълумотларни қайта ишловчи тизим мавжуд. Мазкур тизим касаллик белгиси бўлган тремор ҳаракатларни онгли равишда амалга оширилган ҳаракатлардан ажрата олади. Қошиқ тремор ҳаракатларни 70 фоизга қисқартириб, беморларнинг мустақил овқатланиши учун имкон яратади. 

Тўпламлар нархи - 195 доллар. Кимларгадир бу қимматроқ туюлиши мумкин, бироқ беморларга бировнинг ёрдамисиз мустақил овқатланиш имкониятини қайтариш шунга арзийди.