Qantas Пертдан Лондонга узлуксиз рейсларни йўлга қўйишни режалаштирмоқда. Бу Австралияни Европага тўғридан-тўғри олиб чиқувчи дунёдаги биринчи узлуксиз йўловчи рейси ҳисобланади. Gulf News нашри шу ҳақида маълум қилди. 

Манбага кўра, авиакомпания 17 соатли парвозлар учун Boeing 787-9 Dreamliner самолётларидан фойдаланади. 

"Австралияликлар ҳеч қачон Европага тўғридан-тўғри чиқиш имконига эга бўлишмаган. Шундай экан, бу катта имкониятларга йўл очади", - деди ижрожи директор Алан Жойс. 

"Бу саёҳатчилар учун яхши янгилик, чунки эндиликда Лондонга бориш енгиллашади. Бу Ғарбий Австралия учун ҳам яхши янгилик, чунки у янги иш ўринларини пайдо қилиб, туризмнинг ривожланишига сабаб бўлади. Бу миллат учун ҳам яхши янгилик, чунки у бизни энг йирик савдо ҳамкорларимиздан бирига яқинлаштиради", - қўшимча қилди у.

Ушбу парвоз дунёнинг энг узоқ парвозларидан бири ва Dreamliner'нинг энг узоқ парвози ҳисобланади. 

Манбага кўра, парвоз чипталари келаси йилнинг апрелида сотувга чиқади.

Дунёдаги энг узоқ парвоз қилувчи узлуксиз рейс Дубайдан (БАА) Оклендга (Янги Зеландия) қатновчи Emirates EK448 ва у ердан қайтувчи EK449 рейси бўлиб, у 14 200 километрни ташкил қилади. Мазкур рейс 2016 йилнинг 1 мартидан йўлга қўйилган. Биринчи рейс Airbus A380-800 самолёти орқали амалга оширилган, лекин кейинги мунтазам рейсларда Boeing 777-200LR қўлланилган. 

Qantas'нинг 17 соатли Перт-Лондон тўғридан-тўғри рейсининг  масофаси эса 14 498 километрни ташкил қилади ва дунёнинг етакчи авиакомпаниялари ўртасида рақобатни юзага келтиради.