АҚШнинг сайланган президенти Дональд Трамп разведка хизматларининг кунлик ахборотларидан нолиди. Унинг айтишича, у кунига бир хил такрорланадиган маълумотларни эшитмасликка кифоя қиладиган даражада ақллидир. 

"Мен, биласизми, ақлли инсонман. Менга ҳар куни бир хил нарсани бир хил сўзлар билан айтиш шарт эмас", — деган Трамп Fox News телеканалига берган интервьюсида. 

"Менга айни нарсани ҳар куни эрталаб, бир хил сўзлар билан сўзлаб бериш керак эмас", — деб такрорлаган Трамп. 

"Жаноб, ҳеч нарса ўзгармади. Келинг, бунисини ҳам кўриб чиқамиз", — дея разведка вакилларини ўхшатишга уринган Американинг сайланган президенти.

АҚШ ОАВ Дональд Трампни разведка вакиллари билан ҳафтасига бир маротаба учрашаётгани учун танқид қилган эди. Ундан олдинги давлат раҳбарлари бу каби ахборотларни кўпроқ олишган. Амалдаги президент Барак Обама разведка вакилларини ҳар куни эрталаб, баъзи вақтларда дам олиш кунлари ҳам қабул қилади.