Шанба кунги терактлардан кейин якшанба, 11 декабрда Истанбулда президент Ражаб Тоййиб Эрдўған раислиги остида юксак даражали учрашув бўлиб ўтди. Бу ҳақида Daily Sabah нашри хабар берди. 

Учрашувда бош вазир Бинали Йилдирим, бош вазир ўринбосарлари Нўъмон Куртулмуш, Вейси Кайнак, Туғрул Тўркеш ва бир қатор бошқа вазирлар иштирокида ўтказилди.

Мэбейн президент қароргоҳидаги учрашув икки соат давом этди. 

"Курдистон озодлиги лочинлари" (TAK - Teyrêbazên Azadiya Kurdistan) номи билан танилган террорчи гуруҳ Истанбулда, "Бешиктош" футбол клуби майдони яқинида рўй берган терактлар учун жавобгарликни ўз зиммасига олди. Сўнгги маълумотларга кўра, терактлар натижасида 39 нафар киши ҳалок бўлган, 155 нафари турли жароҳатлар олган. 

Разведка манбаларининг хабарига кўра, гумондор худкуш-террорчилардан бири Туркияга Сурия Демократик Иттифоқ Партияси назоратидаги (PYD - Partiya Yekîtiya Demokrat‎) ҳудуддан келган. 

PYD'нинг ҳарбий қаноти бўлган Халқ Ҳимоя Бирликлари (YPG - Yekîneyên Parastina Gel) бундан аввал, жорий йилнинг февраль ойида Туркияга уруш эълон қилиб, видеомурожаатлар орқали таҳдид қилган. 

PYD ва YPG Сурияда фолият юритувчи PKK террорчи ташкилотининг тармоқлари ҳисобланади. 

TAK'нинг маълум қилишича, уларнинг икки нафар аъзоси ҳужум вақтида ҳалок бўлган, бироқ уларнинг худкуш-террорчи бўлганлиги ё бўлмаганлигига аниқлик киритилмаган.