Қозоғистон президенти Нурсултон Назарбоевнинг баёнот беришича, у мамлакатда автократик тузум ўрнатилгани ҳақидаги фикрга қўшилмайди. 

"Ҳа, бизда президентлик бошқаруви. Республикада президентлик бошқаруви экани конституцияда ёзиб қўйилган. Франция президент ҳокимияти бирмунча қатъийроқ кўринишга эга, бизларники қандай бўлса, шундай. Уни ҳар хил аташади, салкам диктаторлик, ва ёки автократик – буларнинг бари бизларнинг шароитни билмайдиганлар, турмушимизни билмайдиганлар, умуман, ҳеч нарса билмайдиган, фақат газета ўқийдиганларнинг фикри", — деган Назарбоев "25 KZ "Энг янги тарих" ҳужжатли фильм ижодкорлари билан суҳбатда. Ҳужжатли фильм КТК телеканалида 11 декабрда намойиш этилган. 

Назарбоевнинг фикрича, вақти келиб мамлакатдаги бошқарув тизими қайта кўриб чиқилиши мумкин. 

"Бизнинг ҳокимиятимиз, бугунги кун мамлакатимиз учун муносибдир. Бошқа шароитлар келганда, янги босқичга ўтганда, халқ бошқа бошқарув шаклини талаб қилса, халқ билан бирга қандай йўл тутиш юзасидан янги масалаларни муҳокама қиламиз", — дея қайд этган давлат раҳбари. 

Нурсултон Назарбоев 1989 йилдан бери республикани бошқариб келмоқда. 2015 йил апрель ойида ўтказилган навбатдан ташқари президентлик сайловида 97,75 фоиз овоз тўплаган Назарбоев яна беш йил муддатга давлат раҳбарлигига сайланган.