Туркия ташқи ишлар вазирлиги ва разведка вакиллари 14 декабрь, чоршанба куни Ҳалаб (Сурия) масаласида россиялик ҳамкасблари билан учрашишади. У ердаги 150 мингдан ортиқ тинч аҳоли шафқатсиз режим ҳужумлари фонида мухолифат тузоғида қолган. Бу ҳақида Daily Sabah нашри хабар берди

Юқори мартабали турк амалдорининг таъкидлашича, Анқара Ҳалабдаги мухолифатни эвакуация қилишда ёрдам бериш учун АҚШ, Эрон, Россия, Евроиттифоқ ва Форс кўрфази мамлакатлари билан иш олиб бормоқда.

Туркия ташқи ишлар вазири Мавлут Човушўғли сешанба куни ўзининг чехиялик ҳамкасби Любомир Заоралек билан матбуот конференциясида чиқиш қилиб, Туркиянинг Сурия масаласида барча томонлар билан музокаралар олиб бораётганини тасдиқлади. 

"Отишмаларга чек қўйишга доир келишув Ҳалабдаги тинч аҳоли эвакуацияси учун жуда зарурдир. Жароҳат олганлар муолажага муҳтож, аҳоли оч-наҳор, инсонпарварлик ёрдамларини етказишнинг иложи йўқ - Ҳалаб ўз тарихида ҳеч қачон ҳозиргидек жоҳилликни кўрмаган", - деди ташқи ишлар вазири.

Туркия ташқи ишлар вазирлиги Асад режимини Ҳалабдаги тинч аҳолига ҳужум қилишини дарҳол тўхтатишга чақирди.

Вазирликда таъкидланишича, Асад режими Ҳалабнинг шарқий қисмидаги асосий инфратузилма объектлари, жумладан шифохоналар, мактаблар, электр энергия ва сув таъминоти бўлимларини вайрон қилган. 

"Энди режим тинч аҳолига қарата ҳужум қилмоқда ва уларни оммавий қатл қилмоқда, шаҳарни тарк этишни хоҳлаганларга эса имкон берилмаяпти", - дейилади манбада. 

Туркия ТИВ раҳбари Шарқий Ҳалабдаги тинч аҳолига бўлган муносабатдан таажжубда эканлигини билдирди ва режим томонидан бундай ҳаракатларнинг амалга оширилиши инсон ҳуқуларини бузишини қўшимча қилишди. Бундан ташқари, у шошилинч равишда тинч аҳолини БМТ назорати остида эвакуация қилиш ва инсонпарварлик ёрдамини йўлга қўйиш заруратини таъкидлади.