Австралияда тўрт метрли сафсар рангли бўғма илон гольф ишқибозлари кўз ўнгида кенгуруни ютиб юборди. Бу ҳақда BBC News хабар берган.

Воқеа Квинсленд штати шимолида содир бўлди. Ўйин иштирокчилари йирик кенгуруни ўраб олган баҳайбат илонни кўриб қолишган. 

“Бу жуда ҳам ғалати ва даҳшатли манзара эди”, - дея айтиб ўтди спортчилардан бири журналистларга. Унинг сўзларига кўра, илонга қурбонини бўғиб ўлдириш ва ютиб юбориш учун беш дақиқа вақт керак бўлган. Шундан сўнг илон қуриб қолган сой ирмоғида кўздан ғойиб бўлди.

Маълумот учун, сафсар рангли бўғма илон Австралиянинг энг йирик илони саналади. Одатда бу турдаги жониворлар 3,5 метргача ўсиши мумкин, бироқ 8,5 метр бўлган илонлар ҳам учраган. Бундай жониворларнинг йирик турлари кенгуру ва бошқа уй ҳайвонларини овлайди.