Senat 2017 yilgi bandlik dasturini tasdiqladi

O‘zbekiston Oliy Majlisi Senati 2016 yil 13 dekabrda aholi bandligini ta'minlash yuzasidan 2017 yilgi davlat dasturini tasdiqladi. Dastur doirasida 345,3 ming doimiy ish o‘rni barpo etiladi. Shundan 131,1 mingtasi sanoatda, 69,5 ming nafari xizmat ko‘rsatish va servis sohasida, 55,8 ming ish o‘rni qishloq xo‘jaligida, 88,9 ming qurilish va infratuzilma loyihalarida tashkil etiladi. 44 ming ish o‘rni faoliyat ko‘rsatmayotgan korxonalarni qayta tiklash hamda davlat mulkini ijaraga berish asosida paydo qilinadi, deb xabar qilmoqda Uzdaily.uz sayti.

O‘zbekiston, shuningdek, yakka tartibdagi tadbirkorlik sohasida 97,7 ming kishiga yangi ish o‘rinlari tashkil etishni rejalashtirgan.
 
Shu bilan birga, dasturda yillik o‘rta hisobda, 199,1 ming kishini mavsumiy va vaqtincha ishlar bilan ta'minlash ko‘zda tutilgan. 

Dasturni hayotga tatbiq etishda kollej, oliy o‘quv yurtlari va boshqalarning 500 ming nafardan ortig‘ini doimiy ish bilan ta'minlashga katta e'tibor qaratilgan. 

Unga ko‘ra, ishsizlik darajasini 5-6 foiz darajasida saqlab qolish rejalashtirilgan.