Tramp AQShning yangi Davlat kotibi nomini e'lon qildi

AQShning yangi saylangan prezidenti Donald Tramp AQSh Davlat kotibi lavozimiga mamlakatdagi eng yirik neft kompaniyasi bo‘lgan ExxonMobil rahbari Reks Tillersonni tanladi. CNBC telekanali shu haqida xabar berdi. 

Trampning inaguratsiyasi 2017 yilning 20 yanvarida bo‘lib o‘tadi. Shundan so‘ng u kongressga o‘z hukumatidagi vazirlar lavozimlariga nomzodlarni rasman taqdim etadi. 

Reks Tillerson 64 yoshda. U Ostindagi Texas Universitetini tugallagan. Tillerson taxminan 40 yildan beri ExxonMobil'da xizmat qiladi. U o‘z faoliyatini oddiy muhandislikdan boshlagan. 1990-yillarda u kompaniyaning Rossiyadagi loyihalarini boshqargan. 

Tillerson ExxonMobil'ni 2006 yildan buyon boshqarib keladi. 2011 yilda u "Rosneft" bilan Arktikada burg‘ulashga doir shartnomani imzolagan. 2014 yilda Barak Obama ma'muriyati tomonidan Rossiyaga nisbatan joriy qilingan sanksiyalar tufayli ExxonMobil loyihadagi ishtirokini to‘xtatishiga to‘g‘ri kelgan. Tillerson mazkur sanksiyalarga nisbatan e'tiroz bildirgan.