Соғлиқни сақлаш вазирининг 2016 йил 30 ноябрдаги 2842-сонли буйруғи билан рецептсиз бериладиган дори воситаларининг янги рўйхати тасдиқланди. Бу ҳақида 13 декабрь куни Соғлиқни сақлаш вазирлигининг расмий сайтида хабар берилди

Маълум қилинишича, бундан аввал амалда бўлган, шифокор рецептисиз сотиладиган дори воситаларининг рўйхати ўз кучини йўқотган.

Янги рўйхат 192 (илгари – 186) номдаги монопрепаратларни ва 1033 (илгари – 983) номдаги мажмуавий препаратларни ўз ичига олади.

Илгаригидек, Ўзбекистонда рўйхатдан ўтган ва дорихоналардан рецептсиз бериладиган дори воситалари рўйхатига киритилган дори воситаларининг худди шу таркибдаги таъсир қилувчи моддалари ва дори шаклига ҳамда дозасига эга бўлган дори воситалари ҳам киради. 

Шунингдек дори воcиталарининг ўрамлари, қўллаш бўйича йўриқномалари, илова варақаларида кўрсатилган дори воситаларини беришда рўйхатга амал қилиниши кераклиги таъкидланади.

Ҳужжат 2016 йилнинг 5 декабридан кучга кирган.