АҚШ президенти Барак Обама Вашингтон Россияга қарши чоралар кўришини маълум қилди. Бу сайлов жараёнига “аралашиш” билан боғлиқ.

"Менинг фикримча, биз ўзга мамлакат ҳукумати сайловларимизга таъсир кўрсатишга уринганида албатта чоралар кўришимиз керак ва буни амалга оширамиз", - деган Обама NPR радиосига берган интервьюсида.

Унинг сўзларига кўра, АҚШ "ўзлари танлаган вақт ва ерда" жавоб қайтаришади.

"Булардан нимадир оммага маълум қилиниши мумкин, нимадир эса – йўқ. Жаноб Путин менинг бу масаладаги фикримдан яхши хабардор, сабаби мен у билан бу ҳақда гаплашдим", - дея таъкидлаб ўтди Обама.

Маълумот учун, АҚШ разведка ҳамжамияти расмий вакиллари октябрда сайлов тизимларига ҳужум ортида россиялик хакерлар турганини маълум қилишди. Кейинроқ Марказий разведка бошқармаси Москвани ОАВ орқали Демократик партия серверларини бузиб киришда айблади. Бу Дональд Трампга президент бўлишида ёрдам бериш мақсадида амалга оширилган. Шу билан бир қаторда, Федерал қидирувлар бюроси бундай фикрларга қўшилмади. Оқ уй эса кейинчалик сайлов кунида хакерларнинг ҳеч қандай фаоллиги кузатилмаганини тан олган.