Жанубий Корея республикаси ҳукумати 16 декабрь куни фавқулодда ҳолатнинг юқори даражасини эълон қилди. Бунга мамлакатдаги паррандачилик фермаларида парранда гриппининг тез суръатларда тарқалаётгани сабаб бўлган.

Ҳукуматнинг саъй-ҳаракатларига қарамай, улар парранда гриппи тарқалишига барҳам бера олмаяпти. У мамлакатнинг турли туманларига кириб бормоқда. Шу муносабат билан, республика ҳукумати фуқароларга мурожаат қилиб, эпидемияга қарши курашишда кўмак беришни сўраган ва инфекцияни жиловлаш бўйича янги чораларни эълон қилган. 

Корея қишлоқ хўжалиги ва чорвачилик вазири Ким Чжэ Су махсус мурожаат билан чиқиш қилган. Унинг қайд этишича, мамлакат марказий ва жанубий туманларининг икки ҳудудида 17 ноябрда аниқланган инфекция, кейинчалик, бошқа туманларда ҳам аниқланган. 

"Бу сафар бизга H5N6 намунаси хуруж қилмоқда. У 2008 йили Кореяда пайдо бўлган H5N8 намунасидан хавфлироқдир. Шу боис биз унинг тез суръатларда тарқалишини тахмин қилаяпмиз", - деб огоҳлантирган Ким. Унинг айтишича, гарчи мамлакатда бир ойда 16 млн парранда йўқотилган бўлса-да, эпидемия тарқалиши давом этиши, етказилган зарар миқдори ортиши мумкин.