Фуқаро Ф.Жуманиязов олий ўқув юртларига ўқишга кириш учун имтиҳонларга тайёрланиш мақсадида репетитор қидириб юрганида Мастура Қабулова (исм-фамилиялар ўзгартирилган) билан танишиб қолди, деб ёзмоқда “Ҳуқуқ” газетаси.
  
Мастура унга олий ўқув юртига ўқишга кириш учун тайёрланиш шарт эмаслигини, пули бўлса Тошкент шаҳридаги Ўзбекистон Миллий университетига танишлари орқали киритиб қўйишини айтди. Гап орасида хизмат ҳақи 6000 АҚШ доллари бўлишини ҳам қистириб ўтди.

Бироқ қонунни яхши тушунган Ф.Жуманиязов Мастуранинг ҳаракатлари ноқонуний эканлигини билиб, бу ҳақда тегишли ҳуқуқни муҳофаза қилувчи органларга ариза билан мурожаат қилди.

Аризага асосан ўтказилган тезкор тадбирда Мастура Ф.Жуманиязовдан 6000 АҚШ долларини олган вақтда ҳуқуқни муҳофаза қилувчи орган ходимлари томонидан ушланди.

Мастура ёши 30 га тўлмай туриб, фириб йўлига кирди. Қилмиш-қидирмиш, деганларидек, у қонун олдида жавоб берди.