Сеулда Конституцион суд ёнида мамлакат президенти Пак Кин Хенинг ҳокимиятдан четлатилиши қарори тезроқ қабул қилиниши талаби билан 300 минг киши иштирокида намойиш ўтди. Бу ҳақда "Рёнхап" ахборот агентлиги хабар бермоқда.  

Президентга қарши намойишлар 8 ҳафтадан бери минглаб одамларни йиғмоқда. Ёқилган шамларни ушлаган намойиш иштирокчилари парламент томонидан эълон қилинган  президент импичменти Конституцион суд томонидан тезроқ тан олинишини талаб қилишган.

Бундан аввалроқ эса президентни қўллаб-қувватловчи бошқа намойиш ўтган. Унинг иштирокчилари президент импичментини қабул қилган парламентнинг тарқатилиб юборилишини талаб қилишган.

Жанубий Корея парламенти 9 декабрда президентнинг импичменти учун овоз берган. Шундан кейин Пак Кин Хе ўз ваколатларини бажаришни тўхтатган. Унинг ўрнини вақтинчалик бош вазир Хван Гё Ан эгаллаган. Президентнинг ҳокимиятдан четлатилиши Конституцион суд томонидан овоз бериш натижалари тасдиқлангандан кейин якунланади. Қонун бўйича бунга 6 ой ажратилади.

Бунгача Жанубий Кореяда президент импичменти ташаббуси бир мартагина – мамлакатнинг марҳум собиқ президенти Но Му Хён даврида билдирилган. 2004 йил мартида мамлакат парламенти президентнинг импичменти учун овоз берган, бироқ шу йилнинг май ойида бу қарор мамлакат Конституцион суди томонидан бекор қилинган. Шу сабабли Му Хён ўз лавозимини 2008 йилдагина тарк этган.