АҚШдаги черковда оммавий қотиллик содир этишда айбдор, деб топилган Дилан Руф унга ўлим жазоси ҳукми чиқарилиши вақтида руҳий ҳолати ҳисобга олинишини истамаяпти, деб хабар бермоқда Ассошиэйтед Пресс ахборот агентлиги. 

2015 йил июнида 22 ёшли, оқ танли Руф Жанубий Каролина штатидаги Чарлстон шаҳридаги черковда 9 нафар афроамерикаликни отиб ташлаган. Унга ирқий адоват негизида ва бошқа бир қатор жиноятларни содир этиш айби қўйилган. Руф унинг ҳаёти сақланиб қолиши эвазига ўз айбини тан олишни таклиф қилган, бироқ прокуратура бундай келишувга бормаган. АҚШ адлия вазирлиги қотил учун ўлим жазоси берилишига эришмоқчи. Руф 33 та жиноий эпизод бўйича айбланмоқда.

Фото: AP

15 декабрда қотил устидан суд жараёнининг 1-босқичи якунланди, унда жиноятчининг айбдорлиги ёки айбсизлиги бўйича қарор қабул қилинган. Январда эса суд ҳукмини чиқарувчиларнинг шу таркибида суднинг 2-босқичи бошланиши кутилмоқда, унда жиноятчига нисбатан жазо ҳукми чиқарилади, прокуратура Руфга ўлим жазоси берилишини, ҳимоя эса умрбод қамоқ жазоси берилишини талаб қилмоқда. 

"Мен руҳий соғломлигим ёки руҳий ҳолатим ҳақида хулоса тақдим қилиш юзасидан мутахассисларга мурожаат қилмайман", деган жиноятчи.