ФИФА ЖЧ-2018 саралаш босқичи доирасидаги учрашувлар давомида қоидаларни бузган бир нечта терма жамоани жазога тортди.

Англия ва Шотландия футбол ассоциациялари ўйин вақтида сиёсий ҳаракатни амалга оширгани (бу терма жамоалар урушларда ҳалок бўлган Британия ҳамжамияти аскарлари хотирасига қизил кўкнори тасвири туширилган баннерларни кўтариб чиқишган) учун жазоланган.

ФИФА расмий сайтида берилган хабарга кўра, Англия ассоциацияси 45 минг. швейцар франки миқдорида, Шотландия эса 20 минг франк миқдорида жарима тўлайдиган бўлган.

Шунингдек, Уэльс (20 минг) ва Шимолий Ирландия (15 минг) терма жамоалари ҳам жаримага тортилган. Уэльсликлар сербларга қарши шимолликлар эса озарбойжонликларга қарши учрашувда қизил кўкнори тасвири туширилган қора боғичларда майдонга чиқиб келишганди.

Шунингдек, Ирландия терма жамоасининг Швейцарияга қарши ўртоқлик учрашувида кийган футболкасида сиёсий кўринишдаги элементлар борлиги учун ирландлар 5 минг швейцар франки миқдори жарима тўлайдиган бўлди.

Ҳондурас терма жамоаси эса Панамага қарши учрашувда чиққан жанжал сабабли яқин вақтларда уй учрашувларини ўз стадионида ўтказишдан маҳрум қилинди. Федерация 40 минг швейцар  франки миқдори жарима ҳам тўлайди.

Турли хил қоидабузишлар сабаб Польша (35 минг швейцар франки), Аргентина (30 минг), Босния ва Герцеговина (25 минг), Колумбия (25 минг), Панама (25 минг), Мексика (20 минг) ва Венесуэла (20 минг) ҳам молиявий жаримага тортилган.

Таитига қарши учрашувда майдонга тушиш ҳуқуқига эга бўлмаган футболчини ўйинга туширгани учун Соломон ороллари терма жамоасига техник мағлубият ёзилган.

Бундан ташқари, мухлисларнинг Сербияга қарши учрашувда тақиқланган сўзлар билан қилган бақириқлари натижасида Украина футбол федерацияси ҳам 60 минг швейцар франки миқдорида жарима тўлайдиган бўлди.