Германиянинг Volkswagen концерни шартли равишда MPV деб номланган электр микроавтобуслар ишлаб чиқариш жараёнига киришди. Етти кишилик янги маҳсулот, AutoCar нашрининг ёзишича, модуль платформасида ишлаб чиқарилади. У тижорий ва халқ учун мўлжалланган намуналар каби бир неча кўринишда бўлади. 

Микроавтобуснинг куч агрегати суюқлик билан совутилувчи литий-ионли аккумулятордан қувватланади. Шу сабабли, MPV бир марта қувватлангач, 500 кмгача масофани ортда қолдира олади. Хабар қилинишича, VW Modular Electric Drive (MEB) шассиси негизида ишлаб чиқарилиши мумкин. Ушбу платформа асосида VW I.D. микроавтобуси ишлаб чиқилган.

Ҳозирча, концерн вакиллари мазкур маълумотга изоҳ беришгани йўқ. Аммо, Volkswagen томонидан аввал берилган баёнотларга кўра, автомобиль ишлаб чиқарувчиси яқин бир неча йилда электр мотор ёрдамида ҳаракатланувчи автомобиллари сонини ва турини кўпайтиришни режалаштирган. 2025 йилга келиб, бир неча намунадаги шундай автомобиллар мижозлар эътиборига ҳавола этилади.