Жанубий Корея мухолифати мамлакат президенти Пак Кин Хени навбатдаги маротаба танқид остига олди. Бу ҳолат унинг ўзига нисбатан эълон қилинган импичмент юзасидан берган тушунтиришлари билан боғлиқ. Бу ҳақда “Тобуро” Демократик партияси раҳбари Чу Ми Э маълум қилди.

Пак Кин Хенинг ҳимоячилари 16 декабрь куни Конституцион судга (КС) у ўзига қўйилган барча айбловларни рад этгани ҳақидаги ҳужжатни тақдим этишди. Хусусан, президентнинг таъкидлашича, уни ҳукуматдан четлаштириш ноқонунийдир, сабаби барча айбловлар юзасидан далиллар тақдим этилмаган. Пак Кин Хенинг фикрича, шу тариқа парламент депутатлари томонидан унинг айбсизлик презумпцияси бузилган.

Энг йирик мухолиф партияси раҳбари эса Пак Кин Хе истеъфога чиқиш муддатини ортга суришга уринаётгани ҳақида маълум қилди. "Биз буни мураккаблаштириш ҳамда Конституцион суд ишига ҳалал беришларига имкон бермаймиз", - дея айтиб ўтди Чу Ми Э. Унинг таъкидлашича, Пак Кин Хени яқин дугонаси Чхве Сун Силь билан боғлиқ жиноятларга алоқадорликда ҳам гумон қилишмоқда. 

Бундай позиция мухолиф Халқ партияси томонидан ҳам қўллаб-қувватланди. Унинг вакили давлат раҳбарининг КСга юборилган мактуби – истеъфога чиқиш жараёнини ортга суришдан бошқа нарса эмаслиги ҳақида айтиб ўтган.

Маълумот учун, Пак Кин Хенинг президентлик ваколати 9 декабрь куни вақтинчалик тўхтатилди. Бу парламент унинг импичменти учун овоз берганидан сўнг рўй берган. Мамлакат раҳбари вазифасини вақтинчалик бажариш эса бош вазир Хван Гё Анга юклатилди.