Австралия ва Франция 12та сувости кемасини қуриш бўйича келишувни имзолади, деб хабар қилмоқда Ассошиэйтед Пресс агентлиги.

Келишувга Австралия томонидан бош вазир Малкольм Тернбулл, Франция томонидан мудофаа вазири Жан-Ив Ле Дриан имзо чеккан. Битимни имзолаш маросими мазкур ишлаб чиқариш йўлга қўйилиши режалаштирилаётган Аделаида саноат шаҳрида бўлиб ўтган. 

"Хавфсизлик бутун дунёда шартлидир, шу боисдан биз флотимиз ва мудофаа кучларимизни қайта жиҳозлаш ишларини амалга оширмоқдамиз", — деган Австралия ҳукумати раҳбари. Агентлик маълумотларига кўра, Франция Австралияга "Барракуда" синфидаги дизель-электрли сувости кемасини таклиф қилган.

Тернбуллнинг қайд этишича, шартнома қиймати 41 млрд долларга баҳоланмоқда ва у Австралия тарихидаги энг йирик капитал қурилиш ҳисобланади. 2,8 минг нафарга яқин киши 2022 йилда бошланадиган ишлаб чиқариш жараёнида қатнашади. Сувости кемаларини барпо қилиш бўйича тендерда Япония ва Германия рақибларидан яхшироқ таклиф билдирган Франциянинг DCNS компанияси ғолиб чиққан эди.