Германия полицияси Берлиндаги байрам ярмаркаси вақтида юк машинаси Рождество байрамига чиққан кишилар устига қасддан бостириб борганини тасдиқлади.

"Бизнинг кузатувларимиз ушбу юк машинаси аввалдан тузилган режа бўйича Breitscheidplatz байрам ярмаркасига чиққан одамлар устига юрганини тасдиқлади", дейилган полиция маълумотида.

Полициядагилар ушбу ҳодисадан кейин шаҳарда хавфсизликни таъминлаш чоралари кучайтирилганини билдирган.

Душанба оқшомида номаълум шахс юк машинасини Берлин марказида тўпланган одамлар устига бостириб бориши оқибатида 12 киши ҳалок бўлиб, 48 киши турли даражада тан жароҳатлари олди.

Ҳайдовчи яширинишга уринди, бироқ қўлга олинди. Кабинада бўлган иккинчи киши жонсиз ҳолда топилган.

Норасмий манбаларга кўра, жиноятни содир этишда гумон қилинаётган шахс Афғонистон ёки Покистонда туғилиб-ўсган. У аввал ҳам унча оғир бўлмаган жиноий ишлар содир этгани учун ҳуқуқ-тартибот идоралари нигоҳига тушгани билдирилган. Кабинадаги иккинчи киши польшалик бўлган.

Polska Wyborcza нашри хабарига кўра, юк машинаси Польшанинг логистик компаниясига тегишли бўлган. 

Юк машинаси Польшада ўғирланган бўлиши мумкин. Унинг ҳайдовчиси 18 декабрь куни соат 16:00дан кейин алоқага чиқмаганди.

Германия ички ишлар вазири Томас де Мезьер юз берган ҳодиса теракт эканлигини кўрсатувчи омиллар кўп эканлигини таъкидлади.