Фредди — дунёдаги энг катта ит. Икки метрли дания кучуги Англиянинг Эссекс шаҳрида эгаси билан бирга яшайди. Рекордлар китобига киритилган жонивор товуқ гўшти ҳамда ёнғоқ мойини севиб истеъмол қилади.

Фредди 92 килограмм тош босади ҳамда дунёдаги энг катта ит саналади. У ҳаттоки Гиннесснинг рекордлар китобига ҳам киритилган.

Жонивор орқа оёқларига турса – баландлиги 2,3 метрни ташкил қилади.

Фредди эгаси, собиқ модель Клейри Стоумэн ҳамда Флёр исмли синглиси билан бирга яшайди.

Аёл ўз жониворларига жуда ўрганиб қолган – улар унинг ҳаёт мазмунига айланган.

"Менинг фарзандим йўқ, шунинг учун итларни худди ўзимнинг болаларимдек яхши кўраман. Улар менга ёлғизликни енгишда ёрдам беради", — дейди Клейри.

Аёл иккита итини боқиш учун ҳар йили тахминан 12,5 минг фунт маблағ сарфлайди.