"Газпром" Туркиядаги энг йирик активи – компания ва Газпромбанкнинг Akfel Holding’даги улушини йўқотиши мумкин. Улар национализация қилинади, деб ёзади "Коммерсант" газетаси вазият билан таниш манбаларга асосан.

Нашр маълумотларига кўра, Туркия ҳукумати Akfel Holding’ни назоратга олиб, директорлар кенгашини ўзгартиргани декабрь бошида маълум бўлди. Бироқ ўшанда россия инвестициялари ҳолати номаълумлигича қолган. Эндиликда эса турк омонатларни суғурта қилиш Жамғармаси (TMSF) норасмий тарзда “акциядорлар вазифасини бажараётгани” ҳақида хабар берди.

Akfel Holding энг йирик тузилмалари — Akfel Gas ("Газпром" билан йилига 2,25 миллиард куб газ бўйича шартнома), Avrasia (0,5 миллиард) ва Enerco (2,5 миллиард) ҳисобланади. Сўнгги икки компанияда 60 фоизлик улуш Akfel ва Газпромбанк қўшма корхонасига тегишли. Enerco’даги бошқа 40 фоиз эса Австриянинг OMV’га қарашли. 

Умумий ҳисобда Akfel гуруҳи компанияларига "Газпром"нинг хусусий турк корхоналарига етказиб берадиган маҳсулот портфелига 55 фоиз тўғри келади. 

Газета маълумотларига кўра, турк ҳукумати 2 декабрь куни Akfel Holding директорлар кенгашини бутунлай янгилаган – унинг таркибига TMSF вакиллари ва маслаҳатчилар кирди. Бу эса Туркияда июль ойида рўй берган давлат тўнтаришига уринишдан сўнг қабул қилинган 674 рақамли фавқулодда қарор ёрдамида амалга оширилди, таъкидлайди нашр.

"Биздан россия газининг Туркиядаги энг кўп фойда келтирадиган сотувчисини олиб қўйишди", - дея маълум қилган газета суҳбатдоши. Akfel ва "Газпром"да эса бу борада ҳеч қандай изоҳ беришмаган.