Конго Демократик Республикаси хавфсизлик кучлари мамлакат пойтахти Киншаса ва бошқа шаҳарларда президент Жозеф Кабиланинг истеъфога кетишини талаб қилиб кўчаларга чиққан намойишчилардан камида 26 нафарини отиб ташладилар, деб хабар бермоқда Reuters ахборот агентлиги. 

Таъкидланишича, норозиликлар 20 декабрда Кабила президентлик сайловларини ўтказмай туриб, ҳокимият тепасида қолгандан кейин бошланган.  

Шунингдек, ўнлаб намойишчилар ҳибсга олинган. 

Аввалроқ полиция ва намойишчилар ўртасидаги тўқнашувлар оқибатида 17 киши ҳалок бўлгани, ўнлаб кишилар жароҳат олгани маълум қилинганди.