Россиянинг Туркиядаги элчиси Андрей Карловнинг ўлдирилиши юзасидан ўтказилаётган суриштирув ишлари давомида 13 киши ҳибсга олинди. Бу ҳақда Haber 7 телеканали хабар берган.

Унинг маълумотларига кўра, ҳужум қилган Мевлуд Мерт Олтинтош туғилган Ойдин вилоятида олти киши қўлга олинган. Улар унинг отаси, онаси, синглиси ва бошқа қариндошлари экани айтилмоқда. Измирда ҳам олти нафар фуқаро ҳибсга олинди. Шунингдек, Анқарада адвокат қўлга олинган. Унинг уйида қотил бир муддат яшагани хабар қилинди.

Ушбу шахслардан баъзилари хавфсизлик Бошқармасига кўрсатма бериш учун олиб кетилган. Бошқалар эса пойтахтга полиция ҳамроҳлигида кейинроқ олиб келинади.

Эслатиб ўтамиз, РФ элчиси Анқарадаги фотокўргазма очилиши вақтида отиб ўлдирилди. Турк ҳукумати хабарига кўра, ҳужум қилган шахс полициячи бўлиб, маҳаллий хавфсизлик кучлари томонидан йўқ қилинган. Россия ташқи ишлар вазирлиги ҳодисани теракт деб атади.