Украина юқори радаси чоршанба куни 2017 йилга мўлжалланган давлат бюджети лойиҳасини қабул қилди. У камомад ҳажмини ялпи ички маҳсулотнинг 3 фоизи даражасида кўзда тутади. Бундай қарор 274 парламентарий томонидан қўллаб-қувватланди.

Украина парламенти 20 октябрь куни келаси йилга мўлжалланган ҳамда 3 фоизлик ўсиш даражасини кўзда тутган давлат бюджети лойиҳасини биринчи ўқишда тасдиқлади. Ҳукумат ҳужжати кейинги йилги инфляцияни 8,1 фоизлик ва бир долларни 27,2 гривналик даражада назарда тутган. Унга кўра газнинг нархи минг куб метр учун 245,8 долларни ташкил қилиши мумкин.

Мамлакат президенти Петр Порошенконинг таклифига кўра, мудофаа ва хавфсизлик соҳаларини молиялаштириш ҳажми 114 миллиард гривнадан  (4,3 миллиард доллар) 136 миллиард гривнага (5,1 миллиард доллар) қадар оширилади. Бу эса ЯИМнинг 5 фоизига тенг.

Ҳукумат келаси йили умумий давлат солиқларини ошириш нияти йўқ. Бюджетда ижтимоий стандартларнинг кўпайтирилиши ҳам кўзда тутилган. 

Аввалроқ, Украина бош вазири Владимир Гройсман энг кам ойлик иш ҳақини икки бараварга - 3,2 минг гривнага (125 доллар) қадар ошириш режалаштирилгани ҳақида хабар берганди.