АҚШнинг Пасифика (Калифорния) шаҳрида истиқомат қилувчи аёл ҳалок бўлган эри Жейш Пателнинг жасадини йўқолган мобил телефонларни қидирувчи илова орқали топди. Бу ҳақда The Mercury News хабар бермоқда.

Калифорния йўл патрули вакили Артуро Монтелнинг сўзларига кўра, 49 ёшли эркак 18 декабрь куни йўл-транспорт ҳодисаси оқибатида олинган жароҳатлар туфайли жон таслим қилган. Унга тегишли бўлган Mercedes номаълум сабабларга кўра йўлдан чиқиб кетиб, тахминан ўн метр баландликдан пастга қулаган. «Экспертиза ҳалок бўлган эркак қонидан алкоголь ёки гиёҳванд моддаларни аниқламади», - дея қўшимча қилиб ўтган у.

Таъкидланишича, Пателнинг турмуш ўртоғи эрининг жасадини эртаси куни топган ҳамда бу ҳақда авария-қутқарув хизматларини хабардор қилган. Аёл йўқолган телефонларни қидиришда ёрдам берувчи мобил иловадан фойдаланди. Бунга қадар эса у Пасифика полициясига эри бедарак йўқолгани ҳақида мурожаат қилган.

Монтелнинг сўзларига кўра, аёл ҳалокат жойида қутқарувчиларни кутиб олди. Улар ҳайдовчи жасадини таниб бўлган ҳолатга келиб қолган автомобилдан чиқариб олиш учун махсус гидравлик қайчилардан фойдаланишган.