Латвия сейми мамлакат ҳарбий контингентининг НАТО бошчилигида Афғонистондаги халқаро амалиётдаги иштирокини узайтиришга қарор қилди. Тегишли қарор лойиҳаси 100 депутатдан 80 нафари томонидан қўллаб-қувватланган. Унга кўра давлат ҳарбийлари Афғонистонда 2020 йилнинг 31 декабрига қадар қоладиган бўлди.

"Афғонистондаги хавфсизлик ва сиёсий вазият ҳамон жуда нозик бўлиб турибди. Шунинг учун мамлакат миллий хавфсизлик кучларини қўллаб-қувватлаш бўйича халқаро ҳаракатлар мамлакатдаги, шунингдек бутун минтақадаги вазиятни барқарорлаштириш учун жуда муҳимдир", - дея айтиб ўтди Латвия мудофаа вазири Раймондс Бергманис парламентарийлар олдида чиқиш қилиб.

Унинг сўзларига кўра, латвия ҳарбий контингентининг Афғонистондаги миссияда иштирок этиши бу даврда ҳам худди аввалги ҳажмда бўлади. "Афғонистонга ҳар олти ойда 30 га яқин ҳарбий хизматчи жўнатилади", - дея айтиб ўтди у.

Латвия НАТОнинг Афғонистондаги миссияси иштирокини узайтириш орқали "альянс доирасида ўз ҳиссасини қўшишда давом этмоқда ва халқаро коалициянинг ишончли аъзо мамлакати эканини тасдиқламоқда", таъкидлаб ўтди мудофаа маҳкамаси раҳбари.

Маълумот учун, Латвия Афғонистондаги халқаро амалиётда 2003 йилдан бери иштирок этади. Айни дамда мамлакатда 24 нафар латвиялик аскар хизмат қилмоқда.