Merkel Milanda otib tashlangan tunislik Berlindagi terakt ijrochisi bo‘lganini tasdiqladi

Barchasi Milanda 23 dekabrda otib o‘ldirilgan terrorchi Anis Amri Berlinda yuk mashinasi yordamida sodir etilgan terakt ijrochisi ekanligiga ishora qilmoqda, deb aytdi Germaniya kansleri Angela Merkel Berlinda jurnalistlarga. 

19 dekabrdagi terakt oqibatida 12 kishi halok bo‘lgandi.

"Barchasi Anis Amri dushanba kuni kechki payt Braytshaydplats maydonidagi Rojdestvo bozorida 12 kishini o‘ldirgan va ko‘plab odamlarga dahshatli jarohatlar yetkazgan terrorchi ekanligiga ishora qilmoqda", deb aytdi Merkel.

Merkel Germaniya hukumatiga teraktdan xulosa chiqarib, qonunchilikka tegishli o‘zgartirishlar tayyorlashni buyurdi.

"Men ichki ishlar va adliya vazirliklariga kansler, federal yerlar boshqarmasi va maxsus xizmatlardagi hamkasblari bilan bu hodisaning har bir jihatini tahlil qilib, natijalarni taqdim qilishga ko‘rsatma berdim. Qonunchilik va xavfsizlik choralariga o‘zgartirish kiritishga ehtiyoj bo‘lgan joylarda biz zarur qadalarni qabul qilamiz va tatbiq qilamiz", deb ta'kidlab o‘tdi kansler.

Merkel Berlindagi teraktning ehtimoliy ishtirokchilarini javobgarlikka tortishga va'da berdi.

"Gumonlanuvchining o‘limi bilan bu jinoyat tergovi to‘xtatilmaydi", deb aytdi Merkel.

Merkel Berlinda jinoiy ishlar boshqarmasi xodimlari bilan uchrashganini aytdi. "Men bilaman, ular Amrining jinoyati haqida bilganlarni, uni, ehtimol, qo‘llab-quvvatlaganlar va hattoki xomiylik qilganlarni aniqlamagunlaricha tinchimaydilar. Agar boshqa aybdorlar yoki ishtirokchilar bo‘lsa, biz ularni javobgarlikka tortamiz", deb ta'kidlab o‘tdi Merkel.