Жанубий Корея ҳукумати Берлин ва Анқарадаги ҳужумлар ортидан мамлакатда террорчилик хавфи ошгани ҳақида эълон қилди.

"Чунан ильбо" нашрининг ёзишича, 22 декабрь куни бўлиб ўтган ҳукумат кенгашида огоҳликни ошириб, жамоат жойларида ҳужумлар олдини олишга қаратилган қатор чора-тадбирларни тайёрлаш юзасидан қарор қабул қилинган.

Хусусан, биринчи навбатда ҳукумат мамлакатнинг чет элдаги фуқароларини ўзларини ҳужумлардан асраш йўлларидан хабардор қилади. Бундан ташқари, республиканинг Сеул ва Пусан каби йирик шаҳарларида аксилтеррорчилик органлари мажлислари бўлиб ўтади.

Кенгашда, шунингдек, ижтимоий тармоқларда ИШИД томонидан олиб борилаётган фаол тарғиботчилик фаолиятига қарши курашиш зарурлиги айтиб ўтилган.

Эслатиб ўтамиз, 19 декабрь куни Анқарадаги кўргазма очилишида Россиянинг Туркиядаги элчиси Андрей Карлов қотил томонидан отиб ташланди. Ушбу суиқасд Россия ТИВ томонидан теракт сифатида баҳоланди.

Шу куни Берлин шаҳрининг марказий қисмида Рождество ярмаркасига чиққан одамлар устигаюк машинаси бостириб бориши натижасида 12 киши ҳалок бўлиб, 50дан ортиқ киши яраланганди. Бу ҳодиса ҳам Германия ҳукумати томонидан теракт сифатида баҳоланди.