Россиялик боксчи Александр Поветкиннинг манфаатларини билдирувчи «Мир бокса» промоутерлик компанияси раҳбари Андрей Рябинский твиттерда спортчининг 13 декабрда топширган янги допинг-намунасида тақиқланган моддалар аниқланмаганини маълум қилди.

"Поветкиннинг VADA’даги (Кўнгилли тарзда допингга синовдан ўтиш уюшмаси) янги намуналари натижаси келди. Ҳаммаси тоза, ҳеч қандай допинг йўқ", деб ёзди Рябинский.

17 декабрда Поветкиннинг WBC чемпиони учун канадалик Бермейн Стивернга қарши жангига бир неча соат қолганда, россияликнинг допинг-намунасида остарин моддаси аниқлангани маълум бўлганди. Шу сабабли Стиверн жангдан бош тортган, унинг ўрнига эса француз Йоанн Дюоп рингга кўтарилган. Россиялик французни 6-раундда нокаутга учратган, бироқ учрашув ўртоқлик мақомини олиб, унда ҳеч қандай унвон ўйналмаган.