Жорий йилнинг 23 декабрь куни Тошкент ислом институти асосий биносида “Таҳфизул-Қуръон” кафедраси ташаббуси билан институт тарихида биринчи бор “Нажотга шошилинг” номли азон айтиш маҳорати мусобақаси ташкиллаштирилди, деб хабар беради Ўзбекистон Мусулмонлари идораси расмий веб портали.

Мусобақанинг асосий мақсади – талабаларда азоннинг тарихи ҳамда унинг талаффузи ва тараннуми, фиқҳий қоидаларини ўзлаштиришларига қизиқтириш, талабалар азонни маҳорат билан айтиш малакасини ҳосил қилишларига кўмаклашишдир. Дастлаб, ҳар бир курс талабалари ўртасида ички мусобақа ўтказилди ва ҳар бир курсдан икки нафар ғолиб талаба мусобақада қатнашиш ҳуқуқига эга бўлди. Мазкур мусобақа “савт” (овозни жарангдор ва баландлиги), “тараннум” (гўзал оҳанг) ва “тўғри талаффуз” (азондаги лафзлар ва ҳарфларни тўғри талаффуз қилиш) шартларини ўз ичига олди.

 

Якуний тўпланган баллар йиғиндисига кўра қуйидаги талабалар ғолиб деб топилдилар: олий ўрин - Нуриддинов Йўлдош, олий ўрин - Неъматов Муҳаммадюсуф, 1-ўрин - Сайдалиев МуҳаммадҲожимирзо, 2-ўрин - Бузрукхонов Акромхон, 3-ўрин - Мансуров Мусо.

Ғолиблар мақтов ёрлиғи ва қимматбаҳо совғалар, иштирокчилар эса эсдалик совғалар билан тақдирландилар.