Кубада олтинчи авлоддаги Core i3, Celeron ва Core i5 процессорлари негизида ноутбук ва планшетлар ишлаб чиқарила бошланди. Бу ҳақда Кубанинг Granma газетасига иқтибос келтирган ҳолда ТАСС ахборот агентлиги хабар бермоқда.  

Нашрнинг ёзишича, компьютер техникаси Кубанинг информатика ишлаб чиқариш корхонасида ишлаб чиқарилмоқда. 

Заводда диагонали 8 ва 10 дюймли иккита планшет тури ишлаб чиқарилмоқда. 10 дюймли планшет клавиатура билан бирга етказилмоқда. Маълумотларга кўра, қурилма HDMI чиқиш, USB ва мини-USB кириш билан жиҳозланган ва 1 терабайтлик ташқи диск билан ишлай олади.

Ишлаб чиқарувчилар компьютер узоқ вақт хизмат қилиши учун маҳаллий иқлим шароитларини, айнан эса юқори намгарчиликни ҳисобга олдилар. Қурилмалар 27 та турли синовдан ўтказилди.

Ишлаб чиқариш технологиясини Хитойнинг Haier маиший техника компанияси тақдим қилган.    

Йиғув цехида кунига 500 қурилма ишлаб чиқариш режалаштирилган. 2017 йилда янги корхона 120 минг қурилма йиғмоқчи. Бу қурилмалар биринчи босқичда маҳаллий ҳукумат ва таълим муассасаларига етказиб берилади.