"Формула-1" автопойгаларининг 7 карра чемпиони, афсонавий Михаэл Шумахернинг 17 ёшли ўғли Мик Шумахер "Формула-3" жамоаси билан шартнома имзолади.

Мик "Prema" жамоаси учун иштирок этади. Мик аввал шу жамоа учун "Формула-4"да иштирок этган ҳамда Италия ва Германия серияларида 2-ўрин эгаллаган. Энди эса у профессионал пиллапояда бир қадамга кўтарилди ҳамда "Формула-1"да иштирок этиш орзусига яна бир қадамга яқинлашди. 

Мик Шумахернинг менежери отасининг менежери Сабина Кем ҳисобланади. Катта Шумахер чанғи учаётганда бошидан олган оғир жароҳати сабабли анчадан бери соғлиғини тикламоқда. 

Кўпчилик мутахассислар Микни отасига қиёслашади. Мик унинг орзуси отаси каби "Формула-1"да ғолиб бўлиш эканлигини айтади. Бунда эса унга 2016 йилги пойга чемпиони бўлган Нико Росберг намуна бўлиши мумкин: 1982 йилда унинг отаси Кеке Росберг "Формула-1" ғолиби бўлган.