Сўровларга кўра, ўз фаолияти давомида бир неча йилга “танаффус” олиш америкаликларга юз минглаб долларга тушиши мумкин, деб ёзади Market Watch.

Нашрнинг мисол келтиришича, маълум бир инсон 22 ёшида ишлашни бошлайди ва йилига 50 минг АҚШ доллари топади, 26 ёшида эса уч йиллик танаффус олади. Бундай вақтинчалик тўхталиш унга тахминан 506 минг долларга тушади: уч йил учун 150 минг доллардан иш ҳақи, пенсия тўловлари ва ижтимоий таъминот бўйича тўловлар (158 минг доллар) ҳамда иш ҳақига қўшимчалар (198 минг доллар).

Market Watch маълумотларига кўра, ҳар йили минглаб америкаликлар ўз касбида танаффус қилиш ҳақидаги қарорга келади. Harvard Business Review’да чоп этилган Harris Interactive фирмасининг сўровига кўра, ҳар 10 аёлдан тўрттаси ва эркакларнинг 24 фоизи бу ишни ўз хоҳишига кўра амалга оширади.

Pew Research Center тадқиқот марказининг кўрсатишича, 39 фоиз оналар ва 24 фоиз оталар бола тарбияси билан шуғулланиш учун карьерасидан вақтинчалик воз кечар экан.

Шунингдек, Harvard Business Review тадқиқотида, эркакларнинг 25 ҳамда аёлларнинг 23 фоизи касбини янги илмий даража ёки иккинчи олий маълумот олиш учун ўз хоҳишига кўра тарк этиши айтилган.