Американинг Consumers Union нотижорат ташкилотига тегишли Consumer Reports журнали MacBook ноутбуклари тарихида биринчи марта ўз ўқувчиларига янги ноутбук  моделларини харид қилишни тавсия этмади. Журнал ходимлари ноутбукларнинг 3 версиясини синовдан ўтказишди ва уларнинг барчасида аккумулятор билан боғлиқ муаммоларга дуч келишди. Бунга Safari браузери айбдор эканлиги тахмин қилинмоқда. 

Consumer Reports — дунёнинг энг нуфузли эксперт нашрларидан бири. Журнал барча техника воситаларини мустақил равишда текширувдан ўтказади ва бу нуфузини жуда қадрлайди: у ўз саҳифаларида реклама жойлаштирмайди, техника синови бўйича таклифларни қабул қилмайди - уларни ўзи танлайди.

Макбуклар шу пайтгача нашр томонидан юқори баҳолаб келинган. Consumer Reports маҳсулотларни турли параметрлар бўйича баҳолайди, уларнинг энг яхшиларига "тавсия қилинувчи" мақоми берилади. Салоҳиятли харидор моделларни текшириб ўтиришига тўғри келмайди, шунчаки "тавсия қилинувчи" техникалар орасидан ўзига тўғри келадиганини танлаб олади. 

2016 йилнинг MacBook Pro'си илк марта "тавсия қилинувчи" мақомини олмади. Apple ўзининг янги моделларини октябрь ойи охирида намойиш қилди, Consumer Reports декабрда янги ноутбуклар синовини тугатди. Журналда таъкидланишича, ноутбуклар экран сифати ва самарадорлик нуқтаи назаридан ўзларини "жуда яхши" намоён этишган. Бироқ уларнинг аккумуляторлари ҳақида бундай деб бўлмайди. 

Журнал MacBook Pro'нинг уч турли версиясини синовдан ўтказган ва ҳар бир модель бир неча мартадан ўтказилган. 13 дюймли экран ва TouchBar'ли MacBook Pro биринчи тестда аккумулятордан 16 соат ишлаган, иккинчисида - 12,75 соат, учинчисида эса - атиги 3,75 соат. TouchBar'сиз модель бир 19,5 соат натижани кўрсатса, бир 4,5 соатга етган. 15 дюймли MacBook Pro аввал 18,5 соат, кейин эса 8 соат натижани кўрсатган. 

Тест синовлари Safari браузерларида ўтказилди. Consumer Reports ўз тестларида синалаётган компьютерларнинг стандарт браузерларини қўллайди; шу боис MacBook Pro Safari'ни қўллайди. 

Тест қуйидагича ўтган: тўлиқ зарядланган компьютер махсус яратилган Wi-Fi тармоғига уланган, экран ёруғлиги ўртача даражага созланган, шундан сўнг компьютерда компания серверидан кетма-кет 10 веб-саҳифа очилган. Бу ҳолат ноутбук батареяси қуввати қолмай, ўчиб қолгунга қадар давом этади. 

Chrome'да натижалар мутлақо бошқа. Consumer Reports тажриба сифатида MacBook Pro'нинг Google Chrome браузерида ишлашини текшириб кўрди. Ҳар бир модель икки мартадан синалган ва натижалар олти ҳолатда ҳам юқори бўлган. Бу Apple'нинг Safari энергетик самарасини таъкидловчи фонида ачинарли ҳолат - компания стандарт браузер билан ишлаганда компьютерларнинг Chrome ёки  Firefox'дагига нисбатан икки соатга кўпроқ ишлашини таъкидламоқда. 

Шу билан бирга журнал Chrome'нинг устунлиги ҳақида тўлиқ хулоса қилиш учун далиллар етарли эмаслигини қайд этган. Тадқиқот натижалари сўнгги баҳоларга ҳеч қандай таъсир кўрсатмайди, чунки Chrome — MacBook Pro'нинг стандарт браузери эмас. 

Apple ноутбукларнинг бир зарядда 10 соат ишлашига ваъда бермоқда. Корпорация Consumer Reports натижаларига изоҳ бермади. Компанияда муаммо айнан нимада эканлигини аниқлаштириб олиш кераклиги таъкидланди. Журнал компьютерларнинг ташхис маълумотларини Apple'га етказди. Бунга жавобан қуйидаги мазмундаги хатни олди: "Mac'га доир саволлари бўлган барча фойдаланувчилар Apple Care'га (қўллаб-қувватлаш марказига) мурожаат қилишлари керак".