Россия президенти Владимир Путин бир қатор хорижий давлатлар ва халқаро ташкилотлар раҳбарларига Рождество ва кириб келаётган Янги йил муносабати билан қутлов йўллади. 

Кремль матбуот хизматининг хабар беришича, бундай мактуб АҚШнинг сайланган президенти Дональд Трампга ҳам жўнатилган. Унда сиёсатчининг расман лавозимига киришганидан сўнг томонлар муносабатларни тиклаш бўйича қадамларни қўйишига умид билдирилган.

Трампга йўлланган мактубда айтилишича, “сўнгги йилларда мамлакатлар дуч келаётган жиддий глобал ва минтақавий масалалар рус-америка муносабатлари замонавий дунёда барқарорлик ва хавфсизликни таъминлаш бўйича муҳим омил бўлиб қолишини кўрсатиб берди”.

Путин америкаликларга Янги йил табригини йўллар экан, Россияда аккредитациядан ўтган америкалик дипломатларнинг фарзандларини Кремлда ўтказиладиган Янги йил арчаси тадбирига таклиф қилган.

Маълумотларга кўра, Путин МДҲ давлатларининг барча етакчиларига қутлов юборган, бироқ Украина президенти Петро Порошенко ва украиналикларни эътибордан четда қолдирган.