Англия футболидаги Boxing Day оғушида яшаётган ишқибозлар учун бугун — 31 декабрь куни, 19-тур доирасида яна 7та беллашув ўтказилади.

30 декабрь куни турнинг илк учрашувида «Эвертон» ва «Ҳалл Сити»2:2 ҳисобида дуранг ўйнаганди. Мерсисайдлик футболчилар ҳисобда икки бор ортда бора туриб, якунда мағлубиятдан қутулиб қолди.

Бугун турнинг марказий ўйини «Ливерпуль» ва «Манчестер Сити» ўртасида ўтказилади. Бу баҳс Тошкент вақти билан соат 22:30да старт олади ва Ўзбекистонга Янги йил кириб келаётган бир вақтда ўз якунига етади.

Меҳмонлар мураббийи бу учрашув қандай кечишини олдиндан шундай ҳазиломуз сўзлар билан ифодалади.
- Агар мен мураббийлар ўриндиғида ўтиришимга тўғри келмаганида, аниқки бу учрашувга чипта сотиб олардим. Лекин илтимос, бу ҳақда Клоппга ҳеч ким айтиб қўймасин.

«Ливерпуль» яна Коутиньосиз ўйнашига тўғри келади. Ўртамиёна жамоалар билан учрашувларда унинг йўқлиги билинмаяпти. Аммо «Сити»га қарши ўйинда бу омил очко олишга тўсқинлик қилиши ҳам мумкин. «Сити» лиганинг энг ҳужумкор жамоасига қарши ҳимояда ўйнамаслиги аниқ.

Янги йилга турнир пешқадами сифатида ўтаётган «Челси» бу турда «Сток»ни қабул қилади. Ўтган турда Марк Хьюз жамоасида «Ливерпуль»ни енгиш имкони бўлганди - агар жамоа ҳисобда олдинда бораётган вақтда устунликни янада ошира олганида. Аммо якунда «қизиллар» - 4:1 ҳисобидаги ғалабага эришди. «Челси» таркибида дисквалификацияларини ўтаган Коста ва Канте яна майдонга қайтади.

«Челси» мавсумнинг биринчи қисмини жароҳатларсиз ўтказмоқда. Қолаверса, «кўклар» ўйини чиқмаган вақтда ҳам омад туфайли ғалабага эришмоқда. Жамоа қаторасига 12 ғалаба қайд этган. АПЛнинг бу борадаги рекорди – 14 учрашувли серия ва бу серия 2002 йилда «Арсенал» томонидан қайд этилган, ўша мавсумда Арсен Венгер шогирдлари чемпион бўлган.

Англия Премьер-лигасининг Янги йил кунидаги ўйинлари UzReport томонидан намойиш этилмайди. Телеканалдаги байрам дастурлари бунга йўл бермайди.

Англия Премьер-лигаси
19-тур беллашувлари

30 декабрь, жума
«Ҳалл Сити» — «Эвертон» 2:2
Голлар: Майкл Доусон, 6 (1:0). Дэвид Маршалл, 45+1-авт (1:1). Роберт Снодграсс, 65 (2:1). Росс Баркли, 85 (2:2).

31 декабрь, шанба
«Манчестер Юнайтед» — «Мидлсбро» (20:00)
«Саутҳемптон» — «Вест Бромвич» (20:00)
«Суонси» — «Борнмут» (20:00)
«Челси» — «Сток Сити» (20:00)
«Бёрнли» — «Сандерленд» (20:00)
«Лестер» — «Вест Ҳэм» (20:00)
«Ливерпуль» — «Манчестер Сити» (22:30)

1 январь, якшанба
«Уотфорд» — «Тоттенҳэм» (18:30)
«Арсенал» — «Кристал Пэлас» (21:00)