10 декабрь куни Истанбулдаги "Бешиктош" жамоаси стадиони яқинида содир этилган теракт вақтида омон қолган йигит шаҳарда Янги йил байрами вақтида содир этилган теракт қурбонига айланган. Бу ҳақда Daily Sabah хабар тарқатди.

Истанбулнинг Европа қитъасидаги қисмида жойлашган Reina номли тунги клубга 1 январга ўтар кечаси Янги йил байрами нишонланаётган вақтда Калашников автомати билан қуролланган террорчи бостириб кирди ва одамларни ўққа тутди. Қурбонлар сони 39 нафарни ташкил этди, яна 69 киши жароҳатланган ҳолда шифохонага ётқизилган.

Газетанинг ёзишича, ҳужумнинг илк қурбонига айланган полициячи Фотиҳ Чақмоқ клуб яқинида соқчилик қилаётганди. У 10 декабрь куни Бешиктош туманидаги стадион яқинида полициячиларга ҳужум уюштирилганида ҳам шу ҳудудда бўлган ва омон қолганди.

10 декабрь кунги теракт оқибатида 44 киши ҳалок бўлган. Бу теракт учун жавобгарликни "Озод Курдистон лочинлари" гуруҳи ўз зиммасига олганди.

1 январь кунги теракт учун жавобгарликни ҳали ҳеч қайси гуруҳ ўз зиммасига олмади.